Unsere Kulturusflug mit dr Klass im Oggtober nach Kopehage isch eso legendär gsi und het eso vyl Spass gmacht, dass e Fortsetzig drvo, no Vorort, e beschlosseni Sach gsi isch. Unseri “Letschti Reihe” het do dr Afang gmacht und d Idee fyr es gmeinsams Nachtässe mit Fondue Chinoise ins Läbe gruefe. Vyle Dangg an däre Stell ans OK fyr d Organisation vo däm Obe. Das isch, wie immer wenn vyl Lüt involviert sind, nid immer ganz eifach, well irgendöper immer irgend e Sonderwunsch uf Lager het. Drum isch es denn au sowyt kho, dass au Käsfondue und es Vegi-Fondue ufem Menuplan gstande isch.
Am besagte Zyschtig isch dr erschti Träffpunggt am halb Säggsi Zobe im Papa Joe’s bym Barfi agsetzt gsi. Es paar Studänte sind diräggt nachem Unterricht in d’Bar gange, anderi händ sich no schäll dehai welle go früsch mache. Noch und noch isch denn eine nachem andere ydruddlet und het sich au no es Bierli oder e Dringg und es paar Nachos gnähmigt. Dernoch simer denn alli Zämme zum Restaurant “Caveau Bâle” in d Grienpfohlgass glofe, wo uns scho scheen deggti Tisch und die letschte Klassegspänli erwartet händ. Schnäll het sich jede sy Platz, meglichst noch bym negschte Fondue-Cacleau, gsicheret und sich mit sym Banggnochber arrangiert. Nachdäm denn au alli ihri Geträngg bstellt händ – d Wyy-Empfählig vom Huus isch übrigens vorzüglig gsi – simmer parat gsi fyr dr Feschtschmaus. Als erschte Gang het’s e faine Salat gäh. Dernoch sind d Bouillon-Pfännli und d Bylage uftischt worde. D Vorfreud isch riesig gsi. Denn sind ändlig die sehnsüchtigst erwa tete Flaischplattene kho – Rind, Kalb und Poulet sind zur Uswahl gstande. Achtung, Fertig und Ynedungge. D Stimmig isch super gsi und vyli schlaui und wenigerschlaui Gspröch sind gfiehrt worde. Mir händs gnosse. Pletzlig dr grossi Schregg – ES HET KAI FLAISCH MEH!!! Die Maischte sind zwar scho satt gsi, aber es het doch no es Grüppli vo Nimmersatte gäh, wo nonig gnueg kha händ. D Kuchi het reagiert und ihre Yserne Vorrot an Pouletflaisch usem Tiefkiehler gholt. Glügg kha, die no hungrige Müüler sind wyder zfriede gsi und händ no ihre letschte Gluscht könne stille. Zem Abschluss het’s denn no dr Kaffi und s eint oder andere Verdauuigsschnäpsli geh. Die Erschte händ denn d Rundi langsam verlo und sind haimegange. Anderi widerum sind no gmietlig zämme hoggeblybe und hän sich no am rästligge Wy gmietlig doo. Es isch uf jede Fall e glungene und tolle Obe gsi und het, wie kennts au anderscht sy, Wyderholigspotenzial.
D Schrybere, Caroline
Dr Fotograaf, Daniel
S OK, Domenico & Patrick
